Белгияда The Insider фош этган ГРУ агенти ҳибсга олинди

Белгияда ҳибсга олинган, эҳтимол ГРУ (РФ ҚК Бош штаби Бош бошқармаси, аввал “ГРУ” деб юритилган) ходими Виктор Лабин Россия мудофаа саноати учун ускуналар етказиб берган. Унинг устидан суд жараёни феврал ойи охирида бошланади.

Фото: Picture alliance

Белгия суди Россия ҚК Бош штаби Бош бошқармасининг (аввал “ГРУ” деб аталган) эҳтимолий ходими Виктор Лабинни ҳибсда сақлаш (қамоқда қолдириш) ҳақида қарор чиқарди. У Россия мудофаа саноати учун ўлчаш машиналарини экспорт қилгани айтилади. Бу ҳақда 19 феврал, пайшанба куни, The Insider нашри қиролликнинг федерал прокуратураси жавобига таяниб хабар берди. Ушбу ҳужжатга кўра, Белгия полицияси Лабиннинг уйида 2025 йил июн ойида тинтув ўтказган. Ўшандан бери у судни кутиб ҳибсда сақланмоқда. Унинг иши бўйича биринчи мажлис 26 феврал кунига белгиланган.

Катта Лабин The Insider’нинг Россиянинг Украинага қарши уруши сабаб ғарб жорий этган санкцияларни айланиб ўтиш схемалари ҳақидаги терговида фигурант ҳисобланади. Аниқланишича, у Белгияда ўғиллари Роман ва Руслан билан бирга бизнес юритган ва Groupe d'Investissement Financier компаниясининг таъсисчиси бўлган.

Ушбу компания Россия ҳарбий пудратчиларига юқори технологик ускуналар етказиб беришга ихтисослашган. Товарларнинг якуний қабул қилувчиси сифатида Москвада рўйхатдан ўтган “Сонатек” МЧЖ кўрсатилган, унинг эгалари ҳам Лабинлар оиласи бўлган.

Москвадаги фирма Россия ҳарбий-саноат мажмуасининг 18 та корхонасига маҳсулот етказиб бериш ва уни техник хизмат билан таъминлаш бўйича хизматлар кўрсатган. Виктор Лабиннинг ўзи Москвада, Народного Ополчения кўчасида жойлашган ГРУ академияси ётоқхонасида расмий пропискага эга бўлган, кейин эса Зеленоградга кўчган — у ердаги уйлардаги айрим квартиралар ҳарбий хизматчиларга берилган.

Унинг Европага аниқ қачон кўчиб ўтгани номаълум, аммо 2000 йилдан бери у Брюсселда Уинстон Черчилл шоҳкўчасида яшаб, тадбиркорлик билан шуғуллангани аниқланган.