Бикмаев голни нишонлашдаги одобсизлиги учун узр сўради

«Локомотив» ҳужумчиси Марат Бикмаев кеча «Пахтакор»га қарши кечган ўйинда киритган иккинчи голини эҳтиросли тарзда нишонлагани учун мухлислардан кечирим сўради.

«Ўзбек футболининг ҳурматли мухлислари ва «Пахтакор» ишқибозлари! «Пахтакор» дарвозасига урган голимни бундай нишонлаганим учун узр сўрашни истаяпман. Бу англашилмовчилик бўлган эди. Мен ҳеч кимни хафа қилишни истамагандим, ҳеч кимни ҳақорат қилишни хоҳламагандим, ишонинг.

Футболда ҳамма нарса бўлади. Ҳиссиётлар жўш ураётган, қизғинлик энг юқори нуқтасига етган, адреналинни ушлаб қолиш иложсиз эди. Шунчаки ўзимни ушлаб қола олмадим. Эс-ҳушим жойида ва ҳаммасини тушуниб турибман, баҳонам йўқ, қўшиламан!!! Мендан хафа бўлмасликлари учун яна бир марта кечирим сўрашни истайман.

P.S. Мен ҳақимда бошқа иғво қилмасликларига умид қиламан», - деб ёзди Бикмаев Instagram саҳифасида.

Қайд этиш керак, ҳужумчи фақат голни нишонлаш тарзи учун узр сўраган бўлиб, ПФЛ эътирозига сабаб бўлган ва кўриб чиқилиши ваъда қилинган қўл ишораси ҳақида оғиз очмаган.