Путин ва Трампнинг Аргентинадаги учрашув вақти маълум бўлди

Россия ва АҚШ президентлари Владимир Путин ҳамда Дональд Трампнинг Аргентинадаги «катта йигирматалик» саммити доирасида учрашуви 1 декабрга режалаштирилган. Бу ҳақда «РИА Новости» делегациялардан биридаги манбага асосан хабар тарқатди.

«Путин ва Трамп ўртасидаги учрашув Аргентинада ташкил этиладиган G20 саммити майдонларида Москва вақти билан соат 17:30га режалаштирилган», - дея маълум қилган манба.

Бундан ташқари, у музокаралар икки соат давом этиши кераклигини айтиб ўтди.

Эслатиб ўтамиз, аввалроқ Дональд Трамп Керч бўғозидаги ҳодиса туфайли Аргентинада ташкиллаштириладиган G20 саммитида ҳамкасби Владимир Путин билан учрашувни бекор қилиши мумкин эканини билдирганди. 

Қўшма Штатлар етакчисининг сўзларига кўра, учрашувни бекор қилиш сабаби унга «тажовузкорлик» ёқмаслигида.