ОАВ: Россия G20’даги учрашув бекор қилингани туфайли жавоб зарбаси беради

Россия президенти Владимир Путин АҚШ президенти Дональд Трамп билан Аргентинадаги G20 саммити доирасида икки томонлама учрашув бекор қилингач, жавоб зарбаси бериши мумкин. Бу ҳақда Washington Examiner россиялик экспертлар фикрига таянган ҳолда ёзмоқда.

Трамп Путин билан Буэнос-Айресда учрашиши «эҳтимоли» ҳақида маълум қилганидан бир соат ўтиб, унинг твиттерида Россия етакчиси билан учрашув бекор қилинишига оид хабар жойлаштирилди. Қўшма Штатлар президенти икки томонлама учрашувнинг бекор қилинишига Керч бўғозидаги ҳодиса сабаб бўлганини билдирди. Бундай ҳаракат Россияни Қўшма Штатлардан узоқлаштириши ҳамда Россия президентининг Америкага қарши санкцияларига олиб келиши мумкин, дея таъкидлайди нашр.

«У [Путин] бундан ҳам қаттиқроқ эканини кўрсатади», - деди АҚШнинг Россиядаги собиқ элчиси Александр Вершбоу.

Нью-Йоркдаги Янги мактабнинг (New School) халқаро муносабатлар бўйича эксперти ва СССР собиқ етакчиси Никита Хрушчёвнинг эвараси Нина Хрушчёва фикрича, Трампнинг Путинни «жазолаш» ҳақидаги қарори Америка етакчисининг Саудия Арабистони валиаҳд шаҳзодаси Муҳаммад бин Салмонни мухолиф журналист Жамол Қошиқчи Туркиядаги элчихонада ўлдирилганидан кейин «жазоламаслик» бўйича ноаниқ қарори туфайли ҳам алоҳида эътиборга лойиқдир. Унинг сўзларига қараганда, Трампнинг бундай ёндашуви Россияга иккинчи даражали қудратли давлат роли берилгани, мамлакат етакчиси эса ўз билганича ҳаракат қила олмаслигига оид «Вашингтон консенсуси» қабул қилинганини англатади.

Эслатиб ўтамиз, аввалроқ Кремль Трампнинг Путин билан учрашувни бекор қилиш ҳақидаги қарорига муносабат билдирганди.