Вилья ва Иньеста яна жамоадошларга айланди

«Нью-Йорк Сити» ҳужумчиси Давид Вилья фаолиятини Японияда давом эттирадиган бўлди.

Футболчининг ўзи твиттерда тасдиқлашича, энди у «Виссел Кобе» клуби аъзосига айланди. Ушбу жамоада унинг Испания терма жамоаси ва «Барселона»даги собиқ жамоадоши Андрес Иньеста ҳам тўп суради.

36 ёшли Вилья MLS`нинг сўнгги 4 мавсумида иштирок этди. У 2013 йил ёзида «Барселона»дан «Атлетико»га ўтган, орадан бир йил ўтиб Нью-Йоркка кўчиб кетган эди. Бу мавсум клуб чемпионатни 3-ўринда якунлади, Давид эса 26 ўйинда майдонга тушиб, 20та голда бевосита иштирок этди (15+5).