Путин ҳарбий базада қўлга олиниши мумкинлигига шубҳа билдирди

Россия президенти Владимир Путин Голливудда суратга олинган “Хантер Киллер” жангари фильмидаги воқеаларнинг юз бериши мумкинлигига шубҳа билдирди.

Буэнос-Айресдаги “Катта йигирматалик” саммитида мухбирлар Путинга фильмнинг сюжетини қисқача сўзлаб беришган. Фильм сюжетига кўра, Россия мудофаа вазири мамлакатда ҳарбий тўнтарув амалга ошириб, Захарин исмли президентни ҳарбий базада гаровга олади, Россия президентини эса АҚШ сув ости кемаси қўмондони озод этади.   

“Бизнинг базадами? Юз бериши эҳтимоли кам бўлган сценарий. Фантастик деса ҳам бўлади. АҚШ томонидан Украинага совға қилинган иккита кичик катер Керчь бўғозидан ўта олмади-ю, сиз бўлсангиз, атом сув ости кемаси базамизга киришини истаяпсиз. Ёмон фильм”, деб ҳазиллашган Путин.

Жерард Батлер ва Гэри Олдман иштирокидаги “Хантер Киллер” фильми Россия маданият вазирлигидан прокат гувоҳномасини ололмагани сабабли, Россияда намойишдан олинган. Вазирлик фильм намойишига гувоҳнома бермагани сабабини тушунтиришдан бош тортган. Шунингдек, 2018 йилда Россияда “Сталиннинг ўлими” ва “Европанинг ўғирланган бойликлари” фильмларини намойишга чиқаришга рухсат берилмаган.