Абу-Даби аэропортида йўловчилар қадамлари электр энергияга айлантирила бошланди

Абу-Даби аэропортида йўловчилар қадамларини электр энергияга айлантирувчи йўловчилар ўтиш жойи ишга туширилди. Бу ҳақда БААнинг Arabian Business нашри маълум қилди. 

Майдони 16 квадрат метрни ташкил қилувчи йўлак аэропортнинг биринчи ва учинчи терминали ўртасида жойлашган ва кунига 8 мингга яқин одамнинг қадамларини энергияга айлантиради. Ҳосил қилинган электр энергия йўлакни ёритиш ҳамда қадамлар сонини санаш учун қўлланади.

Маълум қилинишича, йўлакнинг қопламаси бир-бири билан боғланган учбурчак кўринишидаги панеллардан ташкил топган. Электр энергия эса электромагнит генератор ёрдамида ишлаб чиқарилади. Йўлак олдида олинган электр энергия ҳажмини кўрсатувчи интерактив дисплейлар жойлашган.

Йўлак Буюк Британиянинг юқори технологик компанияси томонидан яратилган. Маълум қилинишича, бундай технология Яқин Шарқ давлатлари аэропортларида илк бор қўлланмоқда.