Муроджон Аҳмадалиев жаҳон чемпиони билан жанг қилмоқчи

Олимпиада ва жаҳон чемпионати совриндори, профессионал рингда ҳам муваффақиятли иштирок этаётган, профессионал бокснинг супер ярим енгил (-55,34 кг) вазн тоифасида WBA Interсontinental камари соҳиби бўлган Муроджон Аҳмадалиев жаҳон чемпионлиги камари учун рингга чиқмоқчи. У 5 декабрь куни Instagram’даги саҳифасида амалдаги чемпион Даниэл Романни жангга чорлади.

«Бешта жангимдаги ғалабалар эвазига WBA рейтингида биринчи ўринга кўтарилдим. Бу эса ҳозирда WBA чемпионлик камари соҳиби бўлган Даниэл Романга қарши рингга чиқиш ҳуқуқини беради. Жамоам бу жангни ташкиллаштира олишига ишонаман, лекин бунинг учун чемпионнинг ўзи розилик бериши керак. У чемпион ва унинг қарорини ҳурмат қиламан. Аммо олдимга бутун дунё рейтингида биринчи ўринда бўлишни мақсад қилиб қўйганман. Шундай экан, Даниэл (_babyfaceassassin_), кел биргаликда спортсеварларга ажойиб беллашув намойиш этиб берамиз. Энг муносиб боксчи ғолиб бўлади», дея ёзган Аҳмадалиев.

Маълумот учун, ноябрь ойи якунларига кўра, Муроджон Аҳмадалиев WBA рейтингида биринчи ўринни эгаллаб турибди. Профессионал боксда 5та жанг ўтказган Аҳмадалиев 4та жангда рақибларини нокаутга учратган.

У 25 ноябрь куни америкалик Исак Заратени 7-раундда техник нокаутга учратиб, камарини ҳимоя қилганди.