Чиноздаги «Тонг юлдузи» маҳалласи янада обод бўлди

Тошкент вилояти Чиноз туманидаги «Тонг юлдузи» маҳалла фуқаролар йиғинида “Обод қишлоқ” дастури доирасида йўллар асфальтланиб, янги турар жойлар ва маданий-маиший объектлар фойдаланишга топширилди.

Бу ерда кўпроқ тожик миллатига мансуб фуқаролар яшаши инобатга олиниб, ўзбек ва тожик халқларининг урф-одат ҳамда анъаналарини яққол акс эттиришга алоҳида эътибор қаратилди. Ўзбек-тожик маданият марказида жойлашган кутубхонада ўзбек ва тожик мумтоз адабиёти дурдоналари билан бир қаторда, замондош ёзувчи ҳамда шоирлар асарлари жамланган. Ўқув ва анжуманлар зали, тиббиёт хонаси зарур асбоб-ускуналар билан таъминланди.

Қишлоқдаги 47-умумтаълим мактаби тўлиқ қайта таъмирланди ҳамда 180 ўринли қўшимча бино қурилди. 8-мактабгача таълим муассасаси эса бутунлай янгидан барпо этилди. 60 ўринга мўлжалланган ушбу боғча замонавий талабларга жавоб беради. Ҳар икки муассасада ҳам таълим-тарбия ўзбек ва тожик тилларида олиб бориляпти.

Шунингдек, 120 иш ўрнига мўлжалланган «Фафир» тўқимачилик фабрикаси очилди ҳамда аҳолига қулайлик яратиш мақсадида давлат хизматлари туман маркази филиали ташкил этилди.