2018 йилда истеъмол секторидаги инфляция даражаси маълум бўлди

Жорий йилнинг декабрь ойида мамлакат истеъмол бозоридаги товарлар ва хизматлар нархи ўртача 2,1%га ошди. Бу ҳақда Давлат статистика қўмитаси хабар бермоқда.

Умумий ҳисобда 2018 йил давомида истеъмол секторидаги инфляция даражаси 14,3%ни ташкил этди.

2018 йил давомида ИНИнинг ўртача ойлик ўсиш суръати 1,1%ни ташкил этиб, иқтисодиётга инфляцион босим сентябрь ойидан бошлаб кучайиб борган. Жумладан, 2018 йилнинг охирги тўрт ойи давомида товар ва хизматларнинг истеъмол нархлари ўсиш даражаси 7,6%ни ташкил этди.

2018 йил декабрь ойида товарлар нархи ўртача 2,3%, йил бошидан эса 13,8%га қимматлашган бўлса-да, ушбу гуруҳ индекси истеъмол секторидаги умумий йиллик инфляция даражасидан бирмунча пастроқ даражани ташкил этди (14,3%).

Ой давомида товарлар нархи сезиларли даражада қимматлашиши январь (3,0%) ҳамда декабрь (2,3%) ойларида қайд этилган. 2018 йилнинг июнь ва июль ойларида (0,6% ва 0,5%) эса аксинча, товарларнинг умумий нархлар даражасининг пасайиши, мева-сабзавот нархларининг сезиларли даражада арзонлашганлиги билан бевосита боғлиқ.

2018 йил декабрь ойидаги хизматлар тарифи нархлари товарлар гуруҳи нархлари даражасига нисбатан пастроқ суръатда кўтарилди. Хизматлар тарифлари декабрь ойи давомида ўртача 1,3%га ошди. Умумий ҳисобда 2018 йил мобайнида ушбу соҳадаги тарифлар нархларининг ўсиш даражаси 15,8%ни ташкил этди.

Йирик гуруҳлар бўйича нархларнинг ойлик таҳлиллари шуни кўрсатмоқдаки, 2018 йил давомида хизматлар тарифи ҳамда ноозиқ-овқат маҳсулотлар нархлари барқарор ўсиш тенденциясига эга бўлган (ушбу гуруҳларнинг ўтган ойга нисбатан ИНИ доимий равишда 100,0%дан ортиқни ташкил этган). Ҳар ойдаги озиқ-овқат маҳсулотлари нархлар ўзгариши бирмунча кенг диапазонга эга бўлган (январь ойидаги максимал ўсишдан (3,5%) то июль ойидаги максимал пасайишгача (-2,3%).

Йил бошидан буён нархлар ўзгариши таҳлилига кўра, ушбу гуруҳ нархлари ўзгариши бир-бирига нисбатан ўхшаш вазиятни кўрсатади: 12 ой давомида хизматлар 15,8%, озиқ-овқат маҳсулотлари 14,9% ва ноозиқ-овқат маҳсулотлари нархлари 12,5%га ошган.