Трамп демократлар билан учрашувни биргина саволдан кейин тарк этди

Фото: Melina Mara/The Washington Post

АҚШ президенти Дональд Трамп демократларнинг конгрессдаги етакчилари Чак Шумер ва Нэнси Пелоси билан учрашувни ягона саволга жавоб берганидан кейин тарк этди. Трамп бу ҳақда твиттерда маълум қилди.

Трампнинг айтишича, у демократлардан агар шатдаунни тўхтатса, улар Мексика билан чегара бўйлаб девор қурилишини ўз ичига олувчи чегара хавфсизлиги режасини маъқуллашлари ёки йўқлиги ҳақида сўраган. Шумер ва Пелоси рад жавобини беришган.

“Мен уларга: “хайр”. Унда фойдаси йўқ”, деб айтдим”, деб ёзган Трамп.

АҚШ ҳукумати ишининг вақтинчалик тўхтатилиши, яъни шатдаун 22 декабрдан давом этмоқда. У конгрессда чегарада девор қурилишига маблағ ажратилиши борасидаги келишмовчилик сабабли юзага келган.

Тайёрлаган: Шуҳрат Раҳимов

#девор #Дональд Трамп #шатдаун