12 январь, шанба оқшомида Ўзбекистон ва Туркманистон терма жамоаларининг Осиё Кубоги гуруҳ босқичи 2-тури доирасидаги ўзаро баҳс олдидан ўйинолди расмий тадбирлари бўлиб ўтди.
Видео: Mover (tas-ix)
Видео: Youtube
Учрашув комиссарлари иштирокидаги митингда якшанба куни Ўзбекистон оқ, Туркманистон эса яшил либосда тўп суриши ойдинлашди. Шундан сўнг кечга томон матбуот анжумани ва расмий машғулотлар бўлиб ўтди. Туркманистонликлар устози Язгули Хўжагелдиев ва яримҳимоячи Аҳмет Атаев иштирокидаги матбуот анжумани анча қисқа вақт давом этганини таъкидлаш жоиз.
Бугунги ўйин Тошкент вақти билан соат 21:00да Дубайдаги «Rashid Stadium»да бошланади. Учрашувни мезбон БАА мамлакатидан ФИФА рефериси Аммор Ал–Женейби бошқариб боради. Ўзбекистон бу турда ҳам ғалаба қозонган тақдирда, кейинги босқич йўлланмасини қўлга киритади. Учрашувдан олдин гуруҳнинг бошқа вакиллари – Уммон ва Япония терма жамоалари Абу-Дабида ўзаро ҳисоб-китоб қилиб олади.
Эслатиб ўтамиз, Ўзбекистон термаси биринчи турда Уммон устидан 2:1 ҳисобида ғалаба қозонган бўлса, Туркманистон Япониядан 2:3 ҳисоби билан мағлубиятга учраган эди.
