Юз ёшгача сигаретсиз. Ҳавайида чекишга қарши радикал чора таклиф этилди

Ҳавайи оролларида 100 ёшдан кичикларга сигарет сотишни тақиқлаш таклиф қилинди.

АҚШнинг Ҳавайи штати парламентига 100 (юз) ёшдан кичик одамларга сигарет сотишни босқичма-босқич тақиқлаш назарда тутилган қонун лойиҳаси киритилган. 

Айни вақтда Ҳавайида 21 ёшдан катталарга сигарет сотишга рухсат берилган. Қонун лойиҳаси сигарет сотиб олиш ҳуқуқини берадиган минимал ёшни босқичма-босқич — 2020 йилда 30 ёшгача, 2021 йилда 40 ёшгача, 2022 йилда 50 ёшгача, 2023 йилда 60 ёшгача ва 2024 йилда 100 ёшгача оширишни назарда тутади.

Мазкур ташаббус сигаретларнинг инсон саломатлигига етказадиган зарари билан асосланган. Айни вақтда ушбу тақиқ таркибида никотин бўлган бошқа маҳсулотлар, хусусан, сигара, ҳидланадиган тамаки ва электрон сигаретларга тааллуқли эмас. Қонун лойиҳасида таъкидланишича, Гавайида 150 мингга яқин вояга етган шахс мунтазам тамаки чекади. Архипелагда жами 1,4 миллиондан ортиқ одам истиқомат қилади.

Тақиқни бузган сотувчиларга нисбатан 500 доллардан 2000 долларгача жарима солиш таклиф қилинган. Сигарет сотиб олиш ва сақлаш учун жазо назарда тутилмаган.

Бу қонун лойиҳаси ташаббускори - штат вакиллик палатаси аъзоси, демократ Ричард Крейгандир. Касби шифокор-реаниматолог бўлган бу кишининг ўзи ҳам ўтмишда кашанда бўлган.

«Тамакига қарамликдан қаттиқ азият чекадиган кишилар гуруҳи бор. Менимча, уларни тамаки ишлаб чиқарувчилар ўзига қул қилиб олган. Улар чекиш ўлимга олиб келишини билатуриб ишларини давом эттиришади», деган Крейган Hawaii Tribune-Herald учун берган интервьюсида.

Лойиҳада Ҳавайи штатида тамаки сотувидан олинадиган солиқ миқдорига урғу қаратилган. Бу сумма йилига тахминан 100 миллион долларни ташкил қилади. Штат ҳукумати тамаки сотувидан тушадиган даромад ҳажми камайиб боришини инобатга олиши керак бўлади.

Қонун лойиҳаси тарафдорлари агар лойиҳа қабул қилинса, дўконларнинг пештахталари тамаки маҳсулотларидан буткул тозаланишига ишонишмоқда.

Қайд этиш керакки, Ҳавайи оролларида сигаретга нисбатан АҚШдаги энг қаттиққўл қонунлар амал қилади. 2018 йилдан бошлаб ушбу штатда 21 ёшдан кичикларга сигарет сотиш тақиқланган. Ҳолбуки, АҚШнинг аксарият бошқа штатларида 18 ёшдан бошлаб бемалол тамаки сотиб олиши мумкин.