Боливия президенти АҚШ Мадурога суиқасд тайёрлаётганини айтди

АҚШ сенатори Марк Рубио ва давлат котиби Майк Помпео Венесуэла президенти Николас Мадуро ўлдирилиши мумкинлигини очиқчасига гапиришмоқда. Бу ҳақда Боливия президенти Эво Моралес айтиб ўтди.

Моралеснинг таъкидлашича, АҚШ Венесуэланинг табиий захираларини эгаллаб олмоқчи ва бунинг учун ҳокимиятни ҳар қандай йўл билан қўпориб ташлашга ҳаракат қилади.

Боливия етакчисининг айтишича, Вашингтон Венесуэлада “тинч йўл” билан тўнтарувни амалга ошира олмагандан кейин кескин чораларга боришга тайёр ва шу сабабли Мадуро ўлдириладиган бўлса барча жавобгарлик АҚШ зиммасида бўлади.

“Помпео нима демоқда? У “Мадуронинг куни битди” демоқда. Кеча бир америкалик сенатор эса “Мадуро ўлдирилиши керак эди” деди. Агар Мадуро билан бирор кор-ҳол юз берса, бунга АҚШ, Помпео ва бу сенатор Рубио жавобгар бўлади”, деб айтган Моралес.

Аввалроқ Помпео Вашингтон Венесуэладаги вазиятга таъсир қилишнинг барча вариантларини кўриб чиқаётгани ва жумладан, ҳарбий операция ўтказилиши мумкинлигини айтган.