Бирданига учта жойга ҳужжат топширилганда абитуриент учун фанлар кетма-кетлиги қандай аниқланади?

Бугун, 15 май куни Адлия вазирлиги ташаббуси билан Ўзбекистон Президентининг «Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида»ги қарори юзасидан матбуот анжумани ташкил этилди.

Унда «Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида»ги Президент қарори муҳокама қилинган.

Матбуот анжумани давомида кўпчиликни қизиқтирган саволларга жавоблар олинган, хусусан, уч йўналишдан бирини танлашда фанлар кетма-кетлиги мос бўлиши шарт ёки шарт эмаслигига бир қадар ойдинлик киритилган.

ДТМ бош бошқарма бошлиғи Барно Ражабов фанлар кетма-кетлигига эътибор қаратилиши, акс ҳолда кўп чалкашликлар юзага келиши аниқлиги ҳақида гапирган.

Kun.uz мухбири хабар беришича, «фанлар кетма-кетлигига эътибор қилинмайди» деган хабарлар тасдиқланмаган. Аммо бу масала бўйича яна таклифлар ўрганилмоқда ва якуний қарорга келинмаган.

Ҳуқуқшунос Хушнудбек Худайбердиев телеграмдаги каналида бу масала юзасидан фикрларини билдирган.

«Президент қарори қабул қилингандан сўнг, учта фан бир хил бўлса кифоя, кетма-кетликка қаралмайди, дея хабар берган эдим. Бугунги гаплар кўпчиликни иккилантириб қўймоқда. Кетма-кетликка қараладими ёки йўқми?

Олдиндан айтиб қўяй, мен таълим тизимида расман ишламайман ва ёзганларим расмий мақомга эга эмас.

Бундан ташқари, қонун ҳужжатларида нима дейилган бўлса, ўша тартибни изоҳлашга ҳаракат қиламан, лекин мутасаддилар бунга амал қиладими, йўқми, бунисига кафолат бермайман. Ёзма қоидалар амалиётда бутунлай бошқача талқин қилиниши мумкин.

Энди фанлар кетма-кетлиги ҳақида. 2та асосга кўра, бундай хулосани ёзганман.

Биринчидан, 15 февраль куни ДТМ томонидан Президент қарори лойиҳаси эълон қилинди.

Лойиҳада «абитуриентлар томонидан олий таълим муассасаларини танлашда имтиҳон фанлари блоки ва кетма-кетлигининг мослиги эътиборга олинади» деган алоҳида банд бор эди.

Лекин расман имзоланган Президент қарорида эса кетма-кетлик ҳақидаги банд олиб ташланган. Илк хулоса шундан эди.

Иккинчидан, учта йўналишни танлашда кетма-кетликка қаралмаслиги, лойиҳадаги ўша банд атайин олиб ташлангани тўғрисида таълимга бевосита масъул бўлган мартабали инсонлардан бири хабар қилган эди.

Менимча, кейин режалар яна ўзгариб қолган шекилли. Янада аниқроқ тахмин қиладиган бўлсак, ДТМ тайёрлаган техник база кетма-кетликка қатъий риоя қилишни талаб этади, дастурий таъминотни ўзгартириш учун эса энди вақт деярли йўқ. Ўшанчун фанлар кетма-кетлигига қаралиши таъкидланмоқда, менимча.

Шунингдек, масъуллар орасида барчаси ҳам янгиликларни бу даражада либерал бўлишидан манфаатдор эмасдек гўё. “Шунчасини ҳазм қилиб туринглар, жуда эркалаб кетманглар” дейишибди, шекилли.

Хуллас ўртоқлар, расмий маълумот ва тушунтириш керак бўлса, расмий ташкилотларга мурожаат қилинг, расмий сайтларига киринг. Сайтида Сиз хоҳлаган маълумот борми ёки йўқми, улар билан қанақа боғланасиз, улар Сизга тушунтириш берадими, йўқми, бунисини билмадим.

Агар мабодо жорий йилги қабул жараёнларида расман учта йўналишни танлаш учун фанлар кетма-кетлигига мос бўлишни талаб қилишса (чунки ҳалиям бир қарорга келинмаган, мавҳум бўлиб турибди), унда 2 кун давомида каналимда берилган нотўғри талқиндаги хабар учун ҳаммадан узр сўрайман. Умид қиламанки, бу хабар натижасида ҳеч кимга амалий зиён етмади, шунчаки Сизларнинг беҳудага хурсанд бўлганингиздан хижолатдаман. Абитуриентлар фойдасига яхши гумонда бўлибмиз, ёмонроқ ўйлашимиз керак экан», дейди у.