Тошкент шаҳар ҳокимлиги кўп квартирали уйларни сотиб олмоқчи

Тошкент шаҳар ҳокимлиги уй-жой қурилиши билан шуғулланувчи тадбиркорлардан хонадонларни сотиб олиши ҳақида эълон берди. 

Қайд этилишича, ушбу тадбир уйи бузилишга тушган хонадон эгаларига компенсация сифатида тақдим этиладиган уй-жойларнинг жойи, таъмири ҳамда бошқа хусусиятлари бўйича танлов имкониятини тақдим этиш ва бузилишлар натижасида пайдо бўлиши мумкин бўлган ноқулайликлар ва эътирозларнинг олдини олиш мақсадида амалга оширилмоқда.

Уй-жой қурилиши билан шуғулланадиган тадбиркорларга қуйидаги талаблар қўйилади:

- уй-жойлар тўлиқ таъмирдан чиққан ва тўғридан-тўғри кўчиб кириб яшаш имкониятига эга бўлиши керак;

- таклиф этилаётган салоҳиятли уйлар сони 10 та хонадондан кам бўлмаслиги керак;

- квадрат метри 6 миллион сўмдан кўп бўлмаслиги керак;

- уй манзили, юридик шахс ҳақида тўлиқ маълумотлар, каталог(брошюра), уй-жойлар кўриниши акс этган видеоматериалларни тақдим этиши керак.