«E-IJRO AUKSION» шаффофликни таъминлай оладими?

Тадбиркорларни қўллаб қувватлаш ва давлат объектларини хусусийлаштириш ишларини соддалаштириш мақсадида Ўзбекистон Республикаси Президентининг 2018 йил 11 октябрдаги фармонига мувофиқ, эксперимент тариқасида бўш турган давлат кўчмас мулк объектларини бошланғич нарх и 1 сўмга тенг қийматдаги  «E-IJRO AUKSION»  электрон савдо майдончасида аукционга чиқариб сотиш механизми йўлга қўйилганди. Бунда тадбиркор қайси ҳудудда эканлигидан қатъи назар онлайн аукционда иштирок этиб, давлат объектларини сотиб олиш имкониятига эга бўлган. 

Натижада, жараёнга инсон факторининг аралашмаслиги ва турли ҳужжатларнинг талаб қилинмаслиги унинг шаффофлигини таъминлашга хизмат қилди, дея таъкидланади агентлик расмий ахборотида. 

«4 ой ичида 444 та бўш турган давлат кўчмас мулк объектлари 1 сўмга тенг бошланғич нарх бўйича электрон савдо майдончасида аукционга чиқарилиб, шундан 310 та объект 172 млрд сўм инвестиция киритиш ҳамда 3 500 дан ортиқ янги иш ўринлари яратиш шарти билан 11,2 млрд сўмга сотилиши таъминланди», —  дейди Давлат активларини бошқариш агентлиги директори Аҳадбек Ҳайдаров.

Тадбиркорнинг ҳуқуқ ва мажбуриятлари

Қарорга мувофиқ тадбиркор электрон майдонча орқали сотиб олаётган мулкка маълум миқдорда инвестиция киритиш ва янги иш ўринлари яратиш мажбуриятини зиммасига олади. У ўз мажбуриятларини бажармаган тақдирда унинг мулки тортиб олиниши мумкин.

«Давлат объектини олаётган тадбиркор 3 йил ичида белгиланган миқдордаги инвестицияни киритиши керак. Агар шу муддатда белгиланган инвестицияни кирита олмаса, суд орқали объект ундан олиб қўйилади. Лекин, биз тадбиркорга енгиллик яратиш мақсадида белгиланган вақт давомида инвестициянинг 80-90 фоизи миқдорида маблағ йўналтира олган тадбиркорларга яна бир имкон бериб, уларнинг вақтини узайтириб бераяпмиз. Аммо шундай тадбиркорлар ҳам борки, улар объектдан умуман фойдаланмаган ёки етарлича инвестиция киритмаган. Бу каби тадбиркорлардан мулк қонунда белгилангандек, суд орқали тортиб олинади ва улар киритган инвестиция қайтариб берилмайди», — дея изоҳ берди Ҳайдаров.