Самарқанд вилоятида Қорадарё узра ўтувчи муҳим транспорт кўприги чўкди

М37 — «Самарқанд – Бухоро – Туркманбоши» автомобиль йўлининг бошланишидаги Қорадарё дарёси устидан ўтган кўприк бироз оғиб, бир қисми чўккан. Шундан буён кўприкнинг ярмида транспорт воситаларининг ҳаракати чеклаб қўйилган. Талофатлар қайд қилинмаган бўлса-да, кўприк нима сабабдан чўккан? Ҳаракат қачонгача кўприкнинг ярмида давом эттирилади?

Шу каби саволларга ойдинлик киритиш учун Kun.uz мухбири Самарқанд мунтазам йўллардан фойдаланиш унитар корхонасига мурожаат қилди.

Маълум қилинишича, халқаро магистрал ҳисобланувчи М37 — «Самарқанд – Бухоро – Туркманбоши» автомобил йўлининг 6-километридаги ушбу кўприк 1970 йилда қурилган.

Жорий йилнинг 17 июнидан дарё ўзанидаги сув сатҳи кўтарилгани сабабли кўприкнинг 6-таянч қисмидаги ростверкнинг таг қисми ювилиши натижасида 5 июлдан бошлаб таянч устуни ғарб томонга оғиб, чўкиш ҳосил бўлган. Натижада, кўприкнинг 6-7 таянч устунлари оралиғида ҳаракат қисмидаги темир-бетон тўсинларда умумий 26 сантиметрга чўкиш пайдо бўлмоқда.

Жорий йилнинг 13 июлдан 14 июлига ўтар кечаси ҳаракат хавфсизлигини таъминлаш мақсадида кўприкда ҳаракатланиш тўхтатилиб, транспорт воситаларининг ҳаракатини ёнидаги, 2006 йилда қурилган кўприкдан ўтказишга қарор қилинган.

Умуман, ҳозирги вақтда Ўзбекистон Республикаси Президентининг 2018 йил 19 декабрдаги «Ўзбекистон Республикасининг 2019 йилга мўлжалланган инвестиция дастурини амалга ошириш чора-тадбирлари тўғрисида»ги қарорига асосан ушбу кўприкни кенгайтириш бўйича қурилиш-монтаж ишлари амалга оширилмоқда.

Ишлаб чиқилган лойиҳа смета ҳужжатларига асосан реконструкция ишларига 12 миллиард сўмга яқин маблағ сарфланади. Янги кўприкнинг габарити (2006 йилда қурилган кўприк билан бирга) 6та ҳаракат тасмасидан иборат бўлади ва 1970 йилда қурилган кўприк устидаги транспорт воситаларининг ҳаракатланиши 2006 йилда қурилган ва реконструкция қилинаётган кўприклар устига ўтказилади.

Ўз мухбиримиз.