Францияда 50 йил муқаддам йўқолган сув ости кемаси топилди  

Франция мудофаа вазирлиги 22 июлда 1968 йил январда Тулон порти яқинида йўқолган “Минерва” сув ости кемаси топилганини эълон қилди.    

“Би-би-си” телеканалининг хабар беришича, сув ости кемасида 52 киши бўлган. Мутахассисларни уни қидиришга сув ости кемасида бўлган денгизчиларнинг яқинлари кўндиришган.    

Қидирув жамоаси фожиа ва сувнинг кўтарилиши ҳамда қайтиши ҳақидаги маълумотларни яна бир бор таҳлил қилиб чиққан. Кемани АҚШнинг хусусий компаниясига тегишли кема аъзолари аниқлашган. ОАВда таъкидланишича, “Миневра” Тулондан 45 км узоқликда 2370 метр чуқурликда топилган. 

Сув ости кемаси билан нима юз берганини аниқлашнинг имкони бўлмаган. Баъзи мутахассислар унинг ҳалокатига бошқарув рулидаги техник муаммолар, бошқа сув ости кемаси билан тўқнашув, торпедо портлаб кетиши ёки кислород бериш тизимидаги носозлик олиб келгани тахминларини илгари суришган.  

1960-йилларда сув ости кемалари билан бир нечта фожиа юз берган. Жумладан, 1963 йилда АҚШнинг бортида 129 денгизчи бўлган USS Thresher, 1968 йилда бортида 99 киши бўлган USS Scorpion, Исроилнинг “Дакар” (1968 йилда йўқолган, бортида 69 киши бўлган) сув ости кемалари ҳалокатга учраган. “Дакар” 1999 йилда Крит яқинида топилган.

Шунингдек, 1968 йилда Тинч океанининг шимолий қисмида собиқ иттифоқнинг К-129 сув ости кемаси йўқолган. Кема 1974 йилда АҚШнинг Марказий разведка бошқармаси ўтказган махфий операция давомида топилган.