Москва прокурори коррупцияга қарши кураш фонди (ФБК) асосчиси Алексей Навальний, ташкилот юристи Любовь Соболь, депутат Илья Яшин, ФБК директори Иван Жданов, Навальнийнинг YouTube-каналидаги дастур бошловчиси Владимир Милов, фонд ходими Георгий Албуров, Навальнийнинг штаби координатори Олег Степанов ва Москвда давлат думаси депутатлигига номзоди ўтмаган Александр Соловьевни судга берди.
Қайд этилишича, даъво аризаси 4 сентябрь куни Москванинг Черемушки райони судида рўйхатга олинган. Аммо ҳозирча даъво ҳаракатсиз қолдирилган.
Черемушки суди матбуот котиби Ирэна Козаеванинг айтишича, даъво аризасида камчиликлар бўлгани учун ҳаракатсиз қолдирилган ва сентябрь охирига қадар қайтадан ариза берилиши мумкин.
Аввалроқ мухолифатчилар устидан «Мосгортранс», Москва метрополитени, «Автомобильние дороги» бошқармаси ва «Анкор» МЧЖ («Армения» ресторани) судга ариза берганди. Улар 27 июль ва 3 августда Москвада ўтказилган келишилмаган акциялар учун компенсация талаб қилмоқда. «Мосгортанс», «Автомобильние дороги» ва «Армения» ресторани 13 млн рубль, метрополитен эса 53,6 минг рубль тўланишини сўрамоқда.
