Цемент саноати вакилларини бирлаштирган халқаро анжуман ўз ишини бошлади

Бугун пойтахтимиздаги International «Hotel Tashkent» меҳмонхонасида «Цемент саноати ва бозори» XVII халқаро анжумани ўз ишини бошлади. Конференциянинг дастлабки куни «Ўзсаноатқурилишматериаллари» уюшмаси бошқаруви раиси Ботир Зарипов, Россия Федерациясининг «Бизнес цем» компанияси раҳбари Евгений Валуков ва бошқалар сўзга чиқиб, қурилиш саноати, хусусан, мамлакатимизда цемент саноатини ривожлантириш ҳамда чет эл инвестицияларни жалб қилиш мавжуд имкониятлар кенгайтириш ва маҳсулот ишлаб чиқариш ҳажмини оширишда муҳим аҳамият касб этишини таъкидлади.

Тадбирда халқаро компания вакилларининг ҳозирги кундаги цементга бўлган жаҳон талаби, соҳадаги янгиликлар, инновацион технологиялар ва янги турдаги маҳсулотлар ҳақида маърузалар тингланди. Шунингдек, конференция давомида цемент саноати учун дунёга машҳур йирик ускуна ва техника ишлаб чиқарувчиларининг кўргазмаси бўлиб ўтди. Унда нафақат маҳаллий ишлаб чиқарувчилар, балки 10 га яқин хорижий компания вакиллари ўз маҳсулот ва хизматлари билан иштирок этишди.

Эътиборлиси, халқаро анжуманда бир қатор йўналишлар ва долзарб мавзуларда илмий маърузалар, тақдимотлар ҳам ўтказилди. Маълумки, «Цемент саноати ва бозори» XVII Марказий Осиё халқаро конференцияси юртимизда 8 маротаба ўтказилиши. «Ўзсаноатқурилишматериаллари» уюшмаси ва Россия Федерациясининг «Бизнес цем» компанияси ҳамкорлигида ташкил этилган жорий анжуманда 16 давлатдан 80 дан ортиқ цемент саноат саноати мутахассислари, халқаро экспертлар, йирик компания вакиллари иштирок этмоқда. Хусусан, Жаҳон цемент ассоциацияси (Буюк Британия), Россия федерациясининг цемент уюшмаси, Москва материалшунослик ва самарали технологиялар институти ва Россия, Германия, Туркия, Қозоғистон, Италия, Швейцария, Австралия, Ҳиндистон каби давлатларнинг етакчи компания ва фирмалари вакиллари юртимизга ташриф буюришган.

«Цемент саноати ва бозори» XVII халқаро конференцияси 6 ноябрга қадар давом этади.

«Ўзсаноатқурилишматериаллари» уюшмаси
Матбуот хизмат