Дунёнинг энг яхши авиакомпанияларига топширилувчи Airline Excellence Awards мукофотининг бош соврини жорий йилда Янги Зеландиянинг Air New Zealand авиакомпаниясига берилди. Ушбу авиакомпания дунёнинг энг яхши авиакомпанияси деб топилди.
Бу ҳақда CNN Travel телеканали хабар берди.
Аввалги йил ғолиби Singapore Airlines 2-ўринни эгаллади. 3-ўринга Япониянинг All Nippon Airways авиакомпанияси лойиқ топилган.
Авиакомпаниялар бир неча мезонлар, жумладан, хавфсизлик даражаси, самолётлар ёши, йўловчиларнинг фикрлари, инвестицион рейтинглари, ходимлари, таклиф қилувчи хизматлари ва даромадлилиги бўйича баҳоланган.
Янги Зеландия авиакомпанияси самолётларининг ҳашаматли салонлари, парвоз вақтидаги кўнгилочиш дастури ва экологиклиги учун бош мукофотга лойиқ топилган. Бошқа мезонлар бўйича ҳам авиакомпания етакчилар орасида бўлган.
Етакчи ўнталикка шунингдек Австралиянинг Qantas, Ҳонгконгнинг Cathay Pacific, БААнинг Emirates, Британиянинг Virgin Atlantic, Тайваннинг EVA Air, Қатарнинг Qatar Airways ва Австралиянинг Virgin Australia авиакомпаниялари кирган.
Америка қитъасида АҚШнинг Delta Air Lines, Европада Германиянинг Lufthansa, Яқин Шарқда Emirates, Осиё-Тинч океани минтақасида Cathay Pacific Airways энг яхши авиакомпаниялар деб эътироф этилган.
Бюджет авиакомпаниялари орасида Америкада JetBlue, Европада эса Wizz Air энг яхши лоукостер деб топилган.
