Томошабинлар ташрифи: Суперлигада энг кўп мухлис қайси клуб ва шаҳарларда?

Баҳорда старт олган Суперлига баҳслари, қиш арафисида якунига етди. Tribuna.uz жамоаларнинг мавсум давомида уй стадионларига ташриф буюрган томошабинлар сонини сарҳисоб қилиб, клубларнинг мухлис тўплаш борасидаги натижаларига назар солди.

 «Навбаҳор» мухлислик борасида пешқадам

Наманганнинг «Навбаҳор» клуби мавсумни 9-ўринда якунлаган бўлса, жамоа мухлислари бу борада пешқадам бўлишди. 2019 йилги Суперлига баҳсларида мезбонликдаги ўйинларда томошабин йиғиш бўйича «Навбаҳор»га тенг келадигани топилмади. Намангандаги стадионнинг майдони мавсум бошланишига тайёр эмаслиги сабаб клуб дастлабки учрашувларини Фарғонада ўтказган бўлишига қарамай, Андрей Канчельскис жамоаси томошабинлар меҳри борасида 1-ўринни олди. «Навбаҳор»нинг Намангандаги биринчи ўйини Суперлига 7-тури доирасида «Сўғдиёна»га қарши ўтказилиб, шу куни стадионда аншлаг кузатилди. Мезбонларнинг 3:1 ҳисобидаги ғалабаси билан якунланган баҳсда «Марказий» ўйингоҳда 25 727 томошабин ташриф буюрган. Умуман олганда, «Навбаҳор» мезбонлигидаги ўтган ҳар бир учрашувда стадионга ўртача 11 233 нафар томошабин тўғри келади. Бу Суперлига-2019даги энг яхши кўрсаткичдир.

 «Пахтакор» ва «Насаф» учликда

«Пахтакор» чемпионлиги билан якунланган мавсумда клуб томошабинлар ташрифи борасида ҳам ижобий ўзгаришларга қўл урди ва бу ўз мевасини бермай қолмади. Яқин ўн йилликда ўз стадионидаги ташриф бўйича ўнликдан ҳам жой ололмай келган «Пахтакор», сўнгги икки йилдирки кучли учталикдан ўрин олмоқда. 2018 йилда уй ўйинларида ўртача 10 893 томошабин йиғиб, 3-ўринда қайд этилган «Шерлар» мухлислари, бу йил ташриф борасида пастроқ кўрсаткич – ўртача 8 048 томошабин қайд этган бўлса-да, бу ташриф борасида 2-ўрини эгаллашларига етарли бўлди.

 Рўзиқул Бердиев бошчилигидаги «Насаф» клуби чемпионатни 7-ўринда якунлаган бўлса, Қашқадарёдаги мухлислар ташрифи бўйича жамоа 3-ўринда қайд қилинди. Қаршидаги «Марказий» стадионда Суперлиганинг 13 та учрашувида ўртача 7 499 томошабин, жами 97 487 мухлис ташриф буюрган. Ўтган мавсум билан таққослаганда, бу борада ўсиш бор. «Насаф» 2018 йилда ўз уйида ўртача 5607 томошабин тўплаб, ўнликка кирган бўлса, бу йил катта ўсишга эришди.

 «Андижон»да ўсиш, «Бухоро»да пасайиш

«Андижон» жамоаси ҳам натижа борасида Суперлиганинг ўнлигига кирган бўлса, стадиондаги мухлислари сони борасида энг яхши тўрт жамоадан бири бўлди. Бу йил катта ҳажмдаги ишлар қилинган «Соғлом авлод» аренасида мезбонларнинг ҳар ўйинига ўртача 7414 томошабин «Бургутлар»ни стадионда қўллаб-қувватлаган. Ўтган йилги Про-лигадаги ташриф 1792 томошабин билан таққослаганда, дебютант клубда яхшигина ўсишни кўриш мумкин.

 Сўнгги беш мавсумдан буён томошабинлар ташрифи борасида энг яхши кўрсаткичлар қаторида бўлган «Бухоро»да бу йил пасайиш кузатилди. Ҳеч шубҳасизки, бунга жамоанинг қониқарсиз натижалари сабаб бўлди. Биргина фактнинг ўзи томошабинлар ташрифи пасайишини изоҳлай олади: «Бухоро» 2019 йилги мавсумда ўз уйида бор йўғи иккита учрашувда ғалаба қозонган ва икки ўйинда ҳам пенальтидан киритилган гол эвазига «Андижон» ва ОКМКни мағлуб эта олган. Суперлигада зўрға илиниб қолган жамоанинг бу йилги учрашувларига ўртача 7 156 ишқибоз келгани ҳам аслида, жамоанинг мухлислардан миннатдор бўлишига етарлича асос бўла олади.

 «Динамо» ва «Сурхон» ёнма-ён

Мавсум бошида ЎФА қарори билан Суперлигага бир вақтда қўшилган «Динамо» ва «Сурхон» клублари томошабинлар ташрифи борасида ҳам ёнма-ён ўринларда бўлишди. Самарқанд жамоаси мавсум якунларига кўра сўнгги ўринни эгаллаб, Суперлигани аламли тарзда тарк этиши ойдинлашган бўлса-да, кўҳна шаҳарлик мухлисларнинг катта футболни соғинганликлари сезилди. Айниқса, 1-даврадаги ўйинларда «Динамо» стадионида ўртача 10 минг атрофида томошабин тўпланган бўлса, қатор мағлубиятлар сабаб ташриф жиддий камая бошлади. Шунга қарамай, мухлисларнинг ўртача ташрифи 6 883 томошабинни ташкил этди ва бу борада «Динамо» 6-ўринда қайд этилди.

 Узоқ муддатдан кейин Суперлигага қайтган «Сурхон» жамоаси чемпионатни 6-ўринда якунлаган бўлса, мухлислари ташрифи борасида 7-ўриндан жой олди. Термиздаги ўйингоҳда ўртача 5 894 томошабин кузатилган.

 Жиззах, Қўқон, Навоий, Бекобод - бир сафда

Ушбу шаҳарлар шарафини ҳимоя қиладиган клублар мезбонлигидаги ўйинларда мухлисларнинг стадионга ташрифи ўртача 4 минг нафардан зиёдроқ бўлган. Хусусан, «Сўғдиёна»да 4538, «Қўқон-1912»да 4502, «Қизилқум»да 4411, «Металлург»да эса ўртача ташриф 4333 нафар мухлисни ташкил этган.

 Пешқадамлар «аутсайдер»га айланганда...

Томошабинлар ташрифи борасида Суперлигада парадокс ҳолат кўп йиллардан буён учрайди. Чемпионатда доимо юқори натижа учун кураш олиб борадиган, жорий мавсум ҳам совриндорлар сафидан ўрин олган «Бунёдкор» ва «Локомотив» клублари мезбонликдаги томошабинлар ташрифи борасида оқсашмоқда. Пойтахтнинг бу клубларидан ташқари, Олмалиқнинг ОКМК клуби ҳам кубок финалларига чиққан бўлишига қарамай, ташриф борасида энг ёмон натижа қайд этмоқда. Бу жамоаларнинг уй ўйинларидаги 2019 йилги ўртача ташриф 2 минг томошабин атрофида қолган. Қолаверса, бу борада мавсум антирекорди ҳам ушбу клублар ўйинига тўғри келган. ОЧЛ учун кураш олиб борган «Бунёдкор» иштирокидаги ўйинда 585, 2-ўрин соҳиби «Локомотив» учрашувига 867, ОКМКнинг Олмалиқдаги сўнгги баҳсларидан бирига 246 нафар томошабин ташриф буюриб, мавсум антирекорди қайд қилинган.

 Суперлига-2019да энг кўп томошабин келган учрашув:

7-тур: «Навбаҳор» - «Сўғдиёна» - 3:1. Наманган, 25 727 томошабин.

Суперлига-2019да энг кам томошабин келган учрашув:

25-тур: ОКМК - «Қизилқум» - 4:1. Олмалиқ, 246 томошабин.

Усмон ИБОДОВ тайёрлади.