Башар Асад Суриядаги урушга олиб келган сабабларни айтиб ўтди

Сурия президенти Башар Асаднинг таъкидлашича, Сурияда уруш бошланишига ҳукумат ўнлаб йиллар давомида экстремистларга нисбатан “ўта сабр-тоқатли” бўлгани олиб келган. Асад урушнинг иккинчи сабаби сифатида мамлакатда уруш бошланишигача қўлга олинмаган 50 мингдан кўпроқ жиноятчи бўлганини айтган. Асад бу фикрларини RaiNews24 италян телеканалига берган интервьюсида айтиб ўтган.

Асад телеканал бошловчисининг у давлатни бошқариш давомида бирор хатога йўл қўйгани ҳақидаги саволига Сурия ҳукумати уруш бошлангандан 9 йилдан кейин ҳам аввалги сиёсатга амал қилишини ва уни янглиш деб ҳисобламаслигини айтди.

Унинг таъкидлашича, Суриядаги уруш унгача бўлган воқеалар, жумладан минтақада 1960-йилларда пайдо бўлган ва 1980-йилларда “жадаллашиб кетган” экстремизм оқибати бўлган.

“Биз бу хавфли масалада ўта сабр-тоқатли бўлганмиз. Бу биз ўнлаб йиллар давомида содир этган катта хато ҳисобланади. Мен бунда ўзимгача бўлган турли ҳукуматлар, жумладан ўзимни назарда тутмоқдаман”, деб айтган Асад.

Асаднинг фикрича, Суриядан Европа Иттифоқига қочқинларнинг оқиб келиши муаммоси Европа “террорчиларни қўллаб-қувватлагани” сабабли юзага келган. 

Сурия президентининг айтишича, Европа “Суриядаги алғов-далғовликни юзага келтиришда асосий иштирокчи бўлган”. Унинг таъкидлашича, Европа Иттифоқи давлатлари Сурия ҳукуматига қарши курашиш мақсадида “террорчилик гуруҳларини қурол билан таъминлаган”. Айнан шу ҳаракатлар Сурияни миллионлаб одамлар тарк этишига сабаб бўлган.

Интервью намойиши италян телеканали томонидан бир неча бор қолдирилгач, у Сурия телеканаллари орқали кўрсатилди. Асад матбуот хизматининг таъкидлашича, намойишнинг қолдирилишига Ғарбнинг Сурия ҳақидаги ҳақиқатни яшириш истаги сабаб бўлган. Италия оммавий ахборотлари эса буни телеканал раҳбариятидаги ички низолар билан боғлашган.