Бешинчи авлод Су-57 қирувчи самолёти Хабаровск ўлкасидаги Комсомольск-Амурдаги синов парвози вақтида тайгага қулаб тушди.
Самолёт «Дзeмги» аэродромидан 120 километр масофада жойлашган тайгада двигателни синовдан ўтказиш вақтида ҳалокатга учраган. Ҳодиса оқибатида қурбонлар йўқ, учувчи катапульта қилишга улгурган.
Самолёт Россия Мудофаа вазирлигига эмас, Комсомольск-Амурдаги Гагарин номли авиазаводга тегишли бўлган.
Қайд этилишича, бу бундай русумли қирувчи самолётнинг илк марта ҳалокатга учрашидир. Ҳодисанинг асосий сабаблари сифатида носозлик ва парвоз вақтидаги хатолик кўрсатилмоқда.
Маълумот учун, Су-57 — Россиянинг кўп мақсадли бешинчи авлод қирувчи самолётидир, у Сухой синов-конструкторлик бюроси томонидан фронт авиацияси учун ишлаб чиқилган.
Россияда бешинчи авлод самолёти ишлаб чиқилиши ҳақида 2000-йиллар бошидаёқ гапира бошланганди, бундай самолёт Россиянинг замонавий қуролланишдаги салоҳиятини намойиш этиши кўзда тутилганди. Аввалига унинг илк парвози 2006 йилга мўлжалланган, кейин муддат бир неча бор сурилган. Якунда Су-57 қирувчи самолётининг илк парвози 2010 йилнинг 29 январида Комсомольск-Амурда амалга оширилганди.
2017 йилнинг декабрида Су-57 янги двигателлар билан парвоз қилади, 2018 йилнинг январь ойи охирида эса самолёт қуроллар билан уча бошлайди.
2018 йил марти Россия Мудофаа вазири энг сўнгги Су-57 Суриядаги синов дастурига киритилгани ҳақида маълум қилади. Бир неча ой ўтиб Шойгу синовлар февраль ойида ўтказилгани ва бу синовлар вақтида қанотли ракеталари учирилгани ҳақида аниқлик киритди.
2019 йилнинг июнида Россия Мудофаа вазирлиги «Бирлашган авиақурувчи корпорация»сидан Су-57 қирувчилари партиясини сотиб олганди. Шартнома Россия президенти Владимир Путин гувоҳлигида «Армия-2019» кўргазмасида тузилганди. Келишувга кўра 76та қирувчи самолёт етказиб берилиши кўзда тутилган.
