АКТ вазирлигида япониялик мутахассис иш бошлади

Ахборот технологиялари ва коммуникацияларини ривожлантириш вазирлигида япониялик мутахассис Эцуаки Йошида иш бошлади.

Унинг Ўзбекистонга келиши президент Шавкат Мирзиёевнинг Японияга ташрифи доирасидаги келишувнинг бир қисми экани айтилмоқда.

Вазирлик маълумотига кўра, япониялик мутахассис ахборот технологиялари корхоналарининг инвестиция фаолиятини жадаллаштириш, техник ва технологик жиҳатдан қайта қуроллантириш дастурини амалга оширишда хорижий инвестициялар ва халқаро кредит линияларини жалб қилиш билан шуғулланади.

49 ёшли Йошида турли йилларда Япония халқаро молия маркази, тадқиқотлар ва статистика департаменти, Япония халқаро ҳамкорлик банки (JBIC)да қатор масъул лавозимларда фаолият юритган.

Эцуаки Йошида Ўзбекистонга келгунга қадар Япония халқаро ҳамкорлик банки кредит, баҳолаш ва хатарларни бошқариш гуруҳининг Мамлакатни кредитлаш департаменти 3-бўлим директори ва бош иқтисодчиси вазифасида ишлаб келаётган эди.