Аддис-Абебада Африка иттифоқининг 33-саммити иш бошлади

Африка иттифоқи қитъанинг 55 давлатини бирлаштирган бўлиб, 2002 йил ёзда Африка бирлиги ташкилоти ўрнига ташкил этилган.

Эфиопия пойтахти Аддис-Абеба шаҳрида Африка иттифоқининг (АИ) 33-саммити очилди. Бу ҳақда eNCA телекомпанияси хабар берди.

Қайд этилишича, учрашув ёпиқ мажлис билан бошланган. Унда кун тартибидаги қатор масалалар аниқлаб олинади, асосий ўринда Ливиядаги вазият туради. Саммитга Миср президенти Абдул Фаттоҳ ас-Сисий раислик қилмоқда.

Ушбу саммитнинг бош мавзуси - "Қуролнинг овозини ўчириш: Африка тараққиёти учун қулай шароитлар яратиш". Саммитда бундан етти йил аввал бўлиб ўтган саммитда 2020 йилга келиб Африкада уруш ва геноцидга барҳам бериш борасидаги қарор доирасида нималарга эришилгани таҳлил қилинади.

Саммитда Африка иттифоқига раислик қилиш ваколати Мисрдан Жанубий Африка Республикасига (ЖАР) ўтади. ЖАР президенти Сирил Рамапоса яқин 12 ой учун иккита муҳим мавзуни белгилаб олди: Ливиядаги вазиятни изга солиш ва Жанубий Суданда тинчлик келишувини тўлиқ амалга ошириш.

ЖАР шунингдек, раис сифатида 1 июлдан Африка эркин савдо континентал ҳудудида (AfCFTA) савдо операциялари бошланишини таъминлаши керак бўлади. Қитъанинг жами 1,27 млрд нафар аҳолига эга 54 мамлакатини қамраб олган мазкур ҳудуд амалда фаолиятини бошлайди.

Африка иттифоқи қитъанинг 55 давлатини бирлаштирган бўлиб, 2002 йил ёзда Африка бирлиги ташкилоти ўрнига ташкил этилган. Унинг бош қароргоҳи Аддис-Абебада жойлашган.