Андижон вилояти Хўжаобод туман тиббиёт бирлашмасидаги талон-торожликлар фош этилди
Фото: REUTERS/Mukhammadsharif Mamatkulov
Бош прокуратура ҳузуридаги Департаментнинг Хўжаобод туман бўлими томонидан туман тиббиёт бирлашмасида бюджет маблағларини мақсадли сарфланиши юзасидан терговга қадар текширув ўтказилган.
Бош прокуратура хабарига кўра, унда бирлашманинг пуллик хизмат бўлими мансабдор ва моддий жавобгар шахслари 2018-2019 йиллар давомида пуллик хизмат бўлимига тиббий кўрикдан ўтиш учун мурожаат қилган 4905 нафар фуқаролар томонидан тўланган пул маблағларини бўлим ғазнасига кирим қилмай, жами 281,9 млн. сўмни ўзлаштириш йўли билан талон-торож қилганликлари аниқланган.
Мазкур ҳолат юзасидан Хўжаобод туман тиббиёт бирлашмаси мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
