БАА коронавирусга қарши курашда Сурияга ёрдам беришга ваъда берди

Абу-Даби амирлиги валиаҳди Муҳаммад бин Зоид Ол Наҳаён Сурия президенти Башар Асад билан телефон орқали суҳбатлашиб, унга коронавирусга қарши курашда ёрдам беришга ваъда берди.

Фото: REUTERS/Khalil Ashawi

Бу ҳақда Ол Наҳаённинг ўзи твиттерда маълум қилган.

“Сурия президенти Башар Асад билан коронавирус эпидемияси оқибатларини муҳокама қилдим ва унга БАА қардош Сурия халқини бу шароитда қўллаб-қувватлашига ва кўмаклашишига ваъда бердим. Офатлар вақтида умуминсоний бирдамлик ҳаммасидан устун ва қардош Сурия бу оғир шароитларда яккалатиб қўйилмайди”, деб ёзган Абу-Даби валиаҳди.

БАА 2018 йил декабрда Форс кўрфази давлатларидан биринчи бўлиб Сурия билан дипломатик алоқаларни тиклаганди ва 2012 йилдан бери ёпиқ бўлган элчихонасини қайта очган.