ШҲТ давлатлари коронавирусга қарши кураш бўйича умумий ҳужжат қабул қилади

Шанҳай ҳамкорлик ташкилоти давлатлари коронавирусга қарши курашиш чоралари бўйича умумий ҳужжат қабул қилади.

Фото: Ольга Балашова

Бу ҳақда Россия соғлиқни сақлаш вазирлиги маълум қилди.

ШҲТга аъзо давлатларнинг соғлиқни сақлаш бўйича мутахассисларининг видеоанжуман режимида йиғилиши бўлиб ўтиб, унда Ўзбекистон, Россия, Хитой, Қозоғистон, Қирғизистон, Тожикистон ва Покистон (Ҳиндистондан ташқари) вакиллари иштирок этган.

Йиғилиш ШҲТ давлатларининг коронавирус эпидемияси билан боғлиқ ҳолда амалга ошираётган хатти-ҳаракатлари муҳокамасига бағишланган.

Иштирокчилар ШҲТ давлатларида коронавирус тарқалиши билан боғлиқ вазият бўйича маълумот беришган ва 8 давлатнинг коронавирус тарқалиши йўлларини яхшироқ тушунишга эришиш ва вируснинг янада тарқалиши олдини олиш бўйича чораларни мукаммаллаштиришдаги амалий тажрибаси борасида маълумот алмашишган.

Йиғилишда ШҲТ давлатлари томонидан коронавирус тарқалишига қарши кўрилаётган чоралар бўйича умумий ҳужжат шакллантиришга қарор қилинган. Бу коронавирусга қарши курашда энг самарали амалиёт ва ижобий тажрибаларни жамлаш мақсадида амалга оширилади.

Йиғилиш иштирокчилари коронавирус тарқалишини бартараф этиш бўйича муҳокама қилинган чораларни ШҲТ давлатлари соғлиқни сақлаш вазирлари йиғилиши даражасига олиб чиқиш зарурлигини маъқуллашган.

Тайёрлаган Шуҳрат Раҳимов

#ШҲТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.