Магнус Карлсен онлайн супермусобақа ғолиби бўлди

Шахмат бўйича амалдаги жаҳон чемпиони Магнус Карлсен Magnus Carlsen Invitational супертурнири ғолиби бўлди. Мусобақа онлайн режимда Chess24 сайтида ўтган.

Фото: Chess 24

Норвегиялик спортчи финалда америкалик Хикара Накамурани 2,5:1,5 ҳисобида мағлуб этди.

Мусобақада дунёнинг 8 нафар кучли шахматчиси иштирок этган. Унинг мукофот жамғармаси 250 минг долларни ташкил қилиб, бу суммадан ғолиб 70 минг доллар олади. Мусобақа Карлсен томонидан ташкил этилган.

Магнус Карлсен 16-жаҳон чемпиони бўлиб, тарихда биринчи мутлақ чемпион ҳисобланади. У шахматнинг уч тоифасида: классик шахмат, рапид ва блиц бўйича жаҳон чемпионатларида ғолиб бўлган. Норвегиялик, шунингдек, Халқаро шахмат федерациясининг рейтингида етакчилик қилган энг ёш шахматчи ҳисобланади. У бунга 19 ёш бир ойлигида эришган. Айни вақтда Карлсен классик шахмат ва рапид бўйича жаҳон рейтингига етакчилик қилмоқда, блицда эса Накамурадан кейин 2-ўринни эгалламоқда.

Хикара Накамура АҚШнинг 5 карра чемпиони бўлиб, 15 ёшида FIDE’нинг халқаро гроссмейстер унвонини олган. У бу борада америкалик шахматчилар учун афсонавий шахматчи Роберт Фишер томонидан ўрнатилган рекордни янгилаган.

Тайёрлаган: Шуҳрат Раҳимов

#шахмат #Магнус Карлсен