11 миллионлик Уҳанда барча аҳоли коронавирусга текширилади

Хитойнинг Уҳан шаҳрига коронавирус қайтгандан кейин 11 млнлик аҳолини коронавирусга тестдан ўтказишга қарор қилинди.

Фото: AFP/JOHANNES EISELE

Бу ҳақда Reuters ахборот агентлиги ўз манбаларига таяниб хабар берди.

Сўнгги икки кун ичида коронавируснинг бутун дунёга тарқалиши ўчоғи бўлган Уҳанда 6 нафар янги бемор аниқланди.

Шундан кейин маҳаллий ҳокимият шаҳарда коронавирус тарқалишининг иккинчи тўлқинига йўл қўймасликка ваъда берди. Тестлашни полимераза занжир реакцияси ёрдамида ўтказиш режалаштирилмоқда. Бу жараён 10 кун вақт олади ва коронавирус ташувчиларини аниқлашга имкон беради. Шаҳар маъмурияти шу йўл билан касалланишнинг иккинчи тўлқини олдини олмоқчи.

Шаҳарда эпидемия авж олган вақтда ҳам бутун аҳоли коронавирусга текширилган эди.

Уҳаннинг барча туманлари маъмуриятлари 12 май куни тестлашнинг батафсил режасини тақдим қилишлари лозимлиги белгилаб қўйилган.

Тайёрлаган Шуҳрат Раҳимов

#коронавирус #Уҳан

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.