Renault Франциядаги бир нечта заводини ёпишни ўйламоқда

Renault автомобиль ишлаб чиқариш компанияси харажатларни камайтириш учун Франциядаги учта заводини ёпиш имкониятини кўриб чиқмоқда. Les Echos газетасининг ўз манбаларига таяниб хабар беришича, бу қарор ҳақида яқин кунларда эълон қилинади.

Компания Шуази-ле-Руадаги 260 киши ишлайдиган корхонасини, Бретанидаги 385 киши ишлайдиган металл эритиш заводини ёпишни режалаштирмоқда. Улардан кейин эса Дьеппедаги 385 киши ишлайдиган автозавод ёпилади.

Ивелин департаментидаги Zoe электромобили ва Nissan Micra автомобилини ишлаб чиқарувчи завод бир неча йилдан кейин автомобиль ишлаб чиқаришдан воз кечади. Ҳозирда бу ерда 2600 киши ишлайди, завод 2019 йилда 160 000 дона машина ишлаб чиқарган.

Ҳукумат яқинда Renault компаниясига 5 млрд евро миқдорида ёрдам ажратишга ваъда берганди.

Компаниянинг қайд этишича, пандемия ортидан юзага келган молиявий қийинчиликлар сабабли Renault харажатларни қисқартиришга мажбур бўлмоқда.

Компания 19 май куни Словениядаги автозаводда ишловчи 3200 ходимдан 400га яқинини бўшатишини эълон қилганди.

Европа автомобиль ишлаб чиқарувчилар ассоциациясининг маълумотига кўра, Францияда янги автомобиллар сотуви 88,8 фоизга тушиб кетган.