Renault Group компанияси Mobilize савдо белгиси остида бир ўриндиқли Solo Concept прототипини тақдим қилди, у тижорат электромобиллари ва каршеринг учун мўлжалланган.
Янгилик Renault компаниясининг Ҳиндистон бўлими томонидан ишлаб чиқилган уч ғилдиракли электромобил бўлиб, ҳайдовчи уни ярим ўтирган ҳолатда жойстик ёрдамида бошқаради.
Салонга чап томондаги эшик орқали кирилади. Электромобил хавфсизлик ёстиқчаси билан жиҳозланган ва тезлиги 25 км/с билан чегараланган, бу эса дубулға киймаган ҳолда хавфсиз ҳаракатланишга имкон беради. Шунингдек, уни бошқариш учун ҳайдовчилик гувоҳномаси ҳам шартмас.
Solo Concept электромобили анъанавий тарзда сим орқали, шунингдек, симсиз қувватланиши ҳам мумкин. Бунда битта Solo Concept электр тармоғига сим орқали уланган бўлиши ва иккинчисига симсиз қувват бериш вазифасини бажариши мумкин. Бундан ташқари, электромобил батареясини ечиб олиш ва зарядлаш учун олиб кетиш ҳам кўзда тутилган.
Mobilize Solo концепцияси билан биргаликда Mobilize Ileo Concept — қувватлантириш бўйича шаҳар инфратузилмаси лойиҳаси ҳам тақдим этилди. Унда электромобилларни қувватлантириш учун терминал, қувватловчи қурилмага эга велосипед ва скутерлар учун тўхташ жойи ва одамлар дам оладиган ўриндиқ, стол ва экранли модул бор. Барча элементларни алоҳида ўрнатиб, кўча инфратузилмасини яратиш мумкин.
Mobilize Solo ва Mobilize Ileo серияли ишлаб чиқариш учун мўлжалланмаган, бироқ индивидуал дизайн ва техник ечимлар бренднинг келажакдаги маҳсулотларида ўз ифодасини топиши мумкин.
