Ҳиндистон ва Бангладешга ёпирилган циклон 14 кишининг ҳаётини олиб кетди

Ҳиндистоннинг шарқига ва Бангладешга ёпирилган “Амфан” циклони 14 кишининг ҳаётини олиб кетди ва минглаб уйларни вайрон қилди.

Фото: Reuters

Бу ҳақда маҳаллий ОАВ хабар берди.

Ҳиндистоннинг аҳоли гавжум штатларидан бири бўлган Ғарбий Бенгалия циклоннинг асосий зарбасини қабул қилган.

“Штатнинг бутун жанубий қисми жабр кўрди. Зарарни баҳолаш учун 3-4 кун кетади. Циклон электр таъминотига таъсир қилди ва кўплаб уйлар, кўприкларни вайрон қилди”, деб айтган штат бош вазири Мамата Банержи.

Унинг маълум қилишича, штатда ёмон об-ҳаво сабабли камида 10 киши ҳалок бўлган.

“Биз коронавирусдан кўра кўпроқ зарар ва вайронгарчиликларга дуч келдик”, деб қўшимча қилган Банержи.

Шунингдек, Ғарбий Бенгалия ва Орисса штатларидан 450 минг киши эвакуация қилинган.

Қўшни Бангладешда циклон сабабли 4 киши вафот этган, 2 млндан кўпроқ киши эвакуация қилинган, ҳарбийлар жанговар ҳолатга келтирилган.

Шу билан бирга, коронавирус пандемияси довул келишига тайёрланиш жараёнини қийинлаштирган. Таъкидланишича, Ғарбий Бенгалия штати полицияси кўплаб одамлар коронавирусга чалинишдан қўрқиб бошпаналарга беркинишдан бош тортганини маълум қилган.

Об-ҳаво мутахассислари маълумотларига кўра, “Амфан” охирги йилларда Бенгал кўрфазида вужудга келган довуллардан энг кучлиси бўлиб, ундаги шамолнинг максимал тезлиги 265 км/соатга етган. У Орисса штатига ёпирилган ва 9 мингдан кўпроқ ҳаётни олиб кетган 1999 йилги суперциклон вақтидан бери Бенгал кўрфазида ҳосил бўлган биринчи суперциклон ҳисобланади.