Маълумот берилишича, бош вазир ўринбосари ва Зеленскийнинг маслаҳатчисида коронавирус аниқланган.
Украина президенти Владимир Зеленскийнинг офисида коронавирус аниқланди, деб хабар берди «Страна.ua» сайти. Президент офисидаги манбаларнинг сўзларига кўра, бош вазир ўринбосари ва вақтинча босиб олинган ҳудудларни реинтеграция қилиш масалалари бўйича вазир Алексей Резников ҳамда Зеленскийнинг маслаҳатчиси Руслан Демченкода коронавирус аниқланган.
«Страна.ua» манбаларининг айтишича, Резников ва Демченко 12 июнда Парижда Франция президентининг ташқи сиёсат бўйича маслаҳатчиси Эммануэл Бонн билан учрашган делегация таркибида бўлишган.
Уларнинг касалликка чалинганликлари Париждан қайтиб келишганидан кейин маълум бўлган. Резников «КиевVласть» сайтига берган интервьюсида делегация Париждан қайтганидан кейин коронавирусга тест топширганини ва натижаларни кутаётганини маълум қилган. У ўзининг касаллик юқтиргани тўғрисидаги хабарни на инкор қилган ва на тасдиқлаган.
«Интерфакс-Украина» агентлигининг маълумотига кўра, Парижга шунингдек, Зеленскийнинг офиси раҳбари Андрей Ермак, унинг ўринбосари Игорь Жовква, мудофаа вазири Андрей Таран ва маданият вазири Александр Ткаченко ҳам борган.
Владимир Зеленскийнинг ўзи 12 июнь куни хотини Еленада COVID-19 аниқлангани сабабли махсус иш режимига ўтганди. Украина президенти хотинида коронавирус аниқлангач, оила аъзолари билан бирга тест топширган ва уларнинг барчасида натижалар манфий чиққан.
Шу боис Зеленский ишлашда давом этишга қарор қилган. Унинг бу вақтдаги фаолияти ҳам қонунчиликка, ҳам санитария нормаларига тўғри келиши эътиборга олинган ва бу учун махсус протокол ишлаб чиқилган.
Аввалроқ Зеленский халқни қўллаб-қувватлаш учун ўзига коронавирус юқтирмоқчи бўлганлигини айтганди.
