Нью-Йорк губернатори Трампни коронавирус тарқалишида айблади

Дональд Трамп АҚШда COVID-19га чалиниш ҳолатлари ўсаётганлиги, аммо бу касалликдан ўлим ҳолатлари камаяётганлигини айтганди.

АҚШ президенти Дональд Трампнинг COVID-19 коронавируси борасидаги сўзлари вазиятни чигаллаштиради ва касалликнинг янада кенг тарқалишига  олиб келади, деди Нью-Йорк штати губернатори Эндрю Куомо.

The Hill нашрининг ёзишича, Куомо Трампнинг мустақиллик куни байрами тадбирида  COVID-19 юқтириш ҳолатларининг 99 фоизи "мутлақ зарарсиз" эканлиги тўғрисидаги сўзларига ана шундай фикр билдирди.

"Трамп бундай баёнотлар билан вирусга ёрдамлашяпти. Касаллик қандай ўсаётганлигини, иқтисодиёт жабрланаётганини кўриб турибсиз, у эса ҳозирги инқирознинг бир бўлаги", - дея губернатордан иқтибос келтиради нашр.

Куомонинг сўзларига кўра, президентнинг гаплари сабабли  америкаликлар "ниқоб тақмаяпти, ижтимоий масофага риоя қилмаяпти, ўзларини эҳтиёт қилмаяпти". Оқибатда 38та штатда коронавирус юқтириш ҳолатлари ўсиши қайд этилмоқда, деб таъкидлади губернатор.

Трамп аввалроқ АҚШда COVID-19га чалиниш ҳолатлари ўсаётганлиги, аммо бу касалликдан ўлим ҳолатлари камаяётганлигини айтганди.

Worldometers сайти маълумотига кўра, АҚШ коронавирус юқтириш ва ундан ўлим ҳолатлари бўйича дунёда етакчилик қилмоқда – касалликка чалинганлар сони 3 миллиондан ва вафот этганлар сони 132 мингдан ошган.