Фаластин БААдан ўз элчисини чақиртириб олди

Фаластин БАА АҚШ воситачилигида Исроил билан тинчлик сулҳи тузишини эълон қилгандан кейин Амирликлардан ўз элчисини чақиртириб олишини эълон қилди. Бу ҳақда Фаластин ташқи ишлар вазири Риёз ал-Маликий баёнотига таяниб “ВАФА” ахборот агентлиги хабар берди. 

“Фаластин давлати президенти Маҳмуд Аббос кўрсатмаси билан Исроил ва БАА ўртасидаги муносабатлар яхшиланиши ҳақидаги баёнотдан кейин зудлик билан БААдан Фаластин элчиси чақиртириб олинмоқда”, деб маълум қилган ал-Маликий.

БАА ва Исроилнинг ярашувини “Фаластин миллий озодлиги ҳаракати” (ФАТҲ) ва ХАМАС ҳам танқид қилган.

“Оккупация Фаластин халқининг бош душмани бўлиб қолмоқда ва биз ўз курашимизни давом эттирамиз”, деб ваъда берган ХАМАС вакили Абдулатиф ал-Кўнуа.

13 августда Исроил ва БАА ўзаро дипломатик муносабатлар ўрнатилишини эълон қилди. Бу қарор АҚШ президенти Дональд Трамп воситачилигида қабул қилинган. Тегишли ҳужжат АҚШда бир неча ҳафта ичида имзоланиши кутилмоқда. Исроил бунда кўнгилли тарзда Иордан дарёсининг ғарбий қирғоғидаги катта ҳудудлар аннексиясидан воз кечади.

Исроил бош вазири Биньямин Нетаньяху шу муносабат билан Исроил ва араб дунёси ўртасида “янги давр бошланишини” айтган. Шу билан бирга, у Исроил Иорданнинг ғарбий қирғоғига ўз даъволаридан воз кечмаслигини ва фақатгина бу режаларини ортга сураётанини таъкидлаб ўтган.

Исроил ва БАА ўртасида муносабатлар яхшиланиши Яқин Шарқ муаммосини ҳал қилишнинг Трамп илгари сурган режасини амалга оширишдаги навбатдаги босқич ҳисобланади. Бу режа Исроилга Иорданнинг ғарбий қирғоғидаги катта ҳудудларни, жумладан Иордан водийсини қўшиб олишга “яшил чироқ” беради. Фаластин бу режага қатъиян қарши чиқмоқда.