Германияда Mercedes автомобиллари сотилиши тақиқланиши мумкин

Германиянинг Daimler автокомпанияси Финляндиянинг Nokia телекоммуникация компаниясига патент бўйича баҳсни ютқазди. Энди Mercedes-Benz автомобиллари савдоси тақиқланиши мумкин.

Фото : KUN.UZ

18 август куни Мангейм шаҳри суди Nokia компанияси даъвосини қаноатлантирди. Суд Daimler компаниясининг Nokia компаниясига тегишли бўлган телекоммуникация технологияларидан патентсиз фойдаланганини аниқлади.

Энди Daimler компанияси Nokia технологиялари жорий қилинган ва сотилган автомобиллар миқдори ҳақида хабар бериши шарт. Daimler раҳбарияти суднинг қароридан норози ва апелляция бермоқчи.

Mercedes автомобилларининг Германияда сотилишини тақиқлаш учун Nokia алоҳида даъво аризасини бериши ва унинг 7 миллиард евро миқдоридаги таъминотини тақдим қилиши лозим.

Немис қонунларига кўра, патент эгалари тақиқ кучга кирган тақдирда жавобгарнинг зарар кўришига масъул бўлади. Агар даъво аризаси берилса, Mercedes автомобилларининг савдоси тақиқланади.

Бироқ Daimler апелляция бериши ҳам мумкин. Агар компания судда ютиб чиқса, таъминот қиймати ёки унинг бир қисми савдога қўйилган тақиқдан келиб чиқадиган зарарни қоплаш учун сарфланади.