7 ойда қанча бензин ишлаб чиқарилгани маълум бўлди

2019 йилнинг шу даврида 595 минг тонна бензин ишлаб чиқарилган бўлса, 2020 йилда - 610 минг тонна.

Фото: Максим Троицкий

Давлат статистика қўмитаси хабарига кўра, 2020 йилнинг январь-июль ойларида республикада автомобиль бензини ишлаб чиқариш ҳажми 2019 йилнинг шу даврига нисбатан кўпайди.

Қайд этилишича, 2019 йилнинг шу даврида 595,1 минг тонна бензин ишлаб чиқарилган бўлса, 2020 йилда - 610,6 минг тонна.

Дизель ёқилғисини ишлаб чиқариш ҳажмида пасайиш кузатилди. 2019 йилда 626,4 минг тонна дизель ишлаб чиқарилган бўлса, 2020 йилда - 580,4 минг тонна.

Шу билан бирга, Ўзбекистон 2020 йил январь-июль ойларида нефть қазиб олишни 2019 йилнинг шу даврига нисбатан (407,7 минг тонна) бироз оширди - 422 минг тоннагача.

2020 йил январь-июль ойларида табиий газ қазиб олиш 28,9 миллиард куб метрни ташкил этди, бу 2019 йилнинг шу даврига нисбатан кам (35,2 миллиард куб метр).

2020 йил январь-июль ойларида Ўзбекистон 835,6 минг тоннадан ортиқ газ конденсати қазиб олди, бу 2019 йилнинг шу даврига нисбатан кам (1,22 млн тонна).