Туркияда коронавируснинг қайтадан авж олиши кузатилмоқда

“Тўй маросимлари,байрамлардаги эҳтиётсизлик бундай кўнгилсизликларга олиб келди. Пандемия кучайди ва давом этмоқда, ҳар кун янги касалланиш ҳолатлари ортиб бормоқда. Биз биринчи тўлқиннинг иккинчи энг юқори даражасини ўтказмоқдамиз. Анқара, Истанбул, Измир, Бурса ҳамон юқори хавф остида”, деб маълум қилган вазир журналистларга.

Унинг таъкидлашича, мамлакатнинг шарқий вилоятларида – Ғазиантеп, Шонлиурфа, Мардин, Эрзурумда кўплаб янги касалланиш ҳолатлари қайд қилинмоқда. Вазир келтирган маълумотларга кўра, Туркияда 2 сентябрда 15 июндан бери энг кўп кунлик касалланиш ҳолати қайд қилинган: сўнгги суткада 1596 нафар кишида вирус аниқланган, 45 киши вирусдан вафот этган. Мамлакатда касалланганлар сони 273 мингдан ошган, вафот этганлар сони 6462 нафарга етган. 

Вазирнинг таъкидлашича, ҳозирда Туркияда энг кўп касалланиш ҳолатлари пойтахт Анқарада қайд қилинмоқда. Пойтахтда касалланиш ҳолатлари сони Туркиянинг энг йирик шаҳри - Истанбулдагидан 2 марта кўпроқни ташкил қилмоқда. “Шу сабабли биз Анқара бўйича ишламоқдамиз ва чоралар кўришни бошладик. Ёши катта одамларга турли муассасаларга кириш тақиқланган. Аммо ҳозирча комендантлик соати киритиш каби чоралар кун тартибида йўқ”, деб таъкидлаб ўтган Хўжа.