Ҳиндистон COVID-19га чалинганлар сони бўйича дунёда иккинчи ўринга чиқди

Касаллик юқтириш ҳолатлари сони ўсишига қарамасдан, мамлакат ҳукумати иқтисодиётни қутқариш мақсадида илгари киритилган чекловларни бекор қилишда давом этмоқда.

Фото: Reuters

Ҳиндистонда коронавирус юқтирганлар сони 4,2 млн кишига етди, деб хабар берди АР агентлиги.

Мамлакатда бир суткада 90 802 кишида касаллик аниқланган бўлиб, COVID-19га чалинганлар сони бўйича Ҳиндистон дунёда иккинчи ўринга кўтарилган.

Касаллик юқтиришлар сони бўйича АҚШ биринчи ўринда турибди - 6,46 млн ҳолат. Бразилия 4,14 млн ҳолат билан учинчи ўринга тушган.

Ҳиндистон соғлиқни сақлаш вазирлиги маълумотига кўра, сўнгги суткада 1016 бемор вафот этган, жами вафот этганлар сони 71 687 нафарга етган.

Касаллик юқтириш ҳолатлари сони ўсишига қарамасдан, мамлакат ҳукумати иқтисодиётни қутқариш мақсадида илгари киритилган чекловларни бекор қилишда давом этмоқда. Хусусан, 7 сентябрдан беш ойлик танаффусдан сўнг Деҳлида метро фаолияти тикланди.

Тайёрлаган Дилшод Аскаров

#Ҳиндистон #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.