Apple 2020 молия йилининг 4-чораги бўйича ўз ҳисоботини тақдим қилгандан кейин унинг акциялари 5 фоизга арзонлашиб кетди. Бунинг натижасида компаниянинг бозор қиймати 100 млрд долларга қисқарди.
Ҳисоботга кўра, компаниянинг 26 сентябрда якунланган 4-чорак бўйича iPhone смартфонлари савдосидан олган тушуми 26,4 млрд долларни ташкил қилди. Бу эса 2019 йилнинг 4-чорагига нисбатан 20,7 фоиз камроқни ташкил қилган. Жумладан, компаниянинг Хитойда айфонлар савдоси ҳажми 29 фоизга қисқариб, 7,9 млрд долларни ташкил қилган. Бу қисқариш компания пандемия сабабли янги смартфонлари чиқарилишини кейинроққа қолдиргани билан боғланган.
Бироқ компаниянинг 4-чоракдаги умумий тушуми 2019 йилдагига нисбатан бироз кўпроқни ташкил қилган ва 64,7 млрд долларга етган. Бунга Mac компьютерлари, AirPods қулоқчинлари ва бошқа аксессуарлар савдоси эвазига эришилган.
Apple жорий сентябрда 12 йил ичида биринчи марта ўз тақдимотини iPhone’нинг янги моделларисиз ўтказди. Бунга пандемия сабабли бутловчи қисмлар етказилишидаги ушланишлар сабаб бўлган. Компания янги смартфонларини кейинроқ, 13 октябрда тақдим қилди.
