Хитой Австралиядан муҳим хомашёлар импортини тўхтатмоқда  

Хитой ҳукумати 6 ноябрдан Австралиядан камида 7та турдаги товарларни, жумладан, кўмир, мис, ёғоч, арпа, шакар, вино ва лбстерлар сотиб олишни тўхтатмоқда. Таҳлилчиларнинг фикрича, Хитой шу тариқа Австралияни жазолашга қарор қилган.

Шу билан бирга, Хитой Австралиядан импорт қилувчи хомашёлар орасида ўзи учун энг муҳим бўлган хомашё - темир рудасига чекловлар киритмаган. 

Харидларни тўхтатиш ҳақидаги кўрсатма йирик трейдерларга оғзаки равишда берилган. Таъкидланишича, бу Хитой ва Австралия ўртасида 2018 йилда бошланган қарама-қаршиликдаги навбатдаги қадам ҳисобланади. Ўшанда Австралия хавфсизлик нуқтаи назаридан ўз ҳудудида Huawei компаниясига 5G тармоқларини ўрнатишга рухсат бермаган. Бундан ташқари, Австралия ҳукумати коронавирус келиб чиқиши борасида халқаро тергов ўтказишга ва уни тарқатишда айбдорни топишга чақиргандан кейин икки давлат ўртасидаги зиддият янада кескинлашган.

Хитой Австралия экспорти учун энг йирик бозор ҳисобланади. 2019 йилда Хитой Австралиядан 104 млрд долларлик хомашё ва товарлар сотиб олган. Австралия Хитойга унга зарур бўлган темир руданинг 60 фоизини, коксланадиган кўмирнинг 60 фоизини, суюлтирилган табиий газнинг 50 фоиздан кўпроғини, миснинг 5 фоизини (1,05 млн тонна) етказади. Австралия, шунингдек, Хитойга винонинг энг йирик экспортчиси ҳисобланади. Бундан ташқари, Хитой Австралиядан ҳар йил 170 минг тонна шакар харид қилади.            

Аввалроқ Хитой ҳукумати санитар меъёрларга тўғри келмаслиги важи остида Австралиядан мол гўшти ва арпанинг бир қисми импортини тўхтатганди. 

Сиднейдаги Lowy Institute таҳлилий маркази ходими Ричард Макгрегор Bloomberg ахборот агентлигига берган интервьюда “Хитой шу йўл билан Австралияни жазолашга ва буни қолганларга ўрнак қилиб кўрсатишга қатъиян қарор қилган”, деб айтган. “Улар [Хитой] сиёсий зиддиятлар ўз баҳосига эга эканини кўрсатиб қўйишмоқчи”, деб қўшимча қилган таҳлилчи.