Хитойда 11-қаватдан қулаган бола тирик қолди

Хитойнинг Далян шаҳрида тўрт ёшли бола 11-қаватдан қулаб тушиб тирик қолди. Бу ҳақда South China Morning Post хабар берди.

Хабарда айтилишича, Сяомин исмли боланинг ота-онаси эшикни қулфлаб, болани видеоэнага билан қолдириб ишларига кетишган.

Бола ёлғизликдан зерикиб, дераза тўрининг калитини топган, уни очган ва дераза токчасига чиққан. Болакай  мувозанатни сақлай олмай, пастга қулаб тушган.

Ҳодисадан икки соат ўтиб уйга қайтган ота дераза очиқлигини кўриб ҳовлига тушган ва қонга беланиб ётган ўғлини зудлик билан шифохонага олиб борган.

Шифокорлар дастлаб боланинг тирик қолиш эҳтимолини беш фоиз деб баҳолашган — унда кўплаб суяк синишлари, жигар, талоқ, ўпка ва буйрак шикастланиши аниқланган. Бироқ кейинчалик унинг аҳволи яхшилана бошлаган.

У 18 кун реанимацияда ётгач, оддий палатага ўтказилган. Ҳозирда Сяоминнинг аҳволи анча яхшиланган.

Нашрнинг ёзишича, ўтган йили Хитой шимолидаги Хэбэй вилоятида тўққиз ёшли қиз 25-қаватдан йиқилиб, 18 қават пастдаги платформага тушганидан кейин тирик қолган.