Трамп Шимолий Каролинада овозлар ҳисобланиши чўзилиб кетганидан аччиқланди

АҚШнинг амалдаги президенти Доналд Трамп Шимолий Каролина штатидаги сайлов участкаларида овозлар ҳисобланиши чўзилиб кетганидан норозилигини билдирди.

Фото: Reuters

Трампнинг твиттерда таъкидлашича, Пенсилвания ва Мичиган штатларида овозларни ҳисоблаш жараёнига Республикачилар партиясидан кузатувчилар қўйилмаган. АҚШ президенти бу хатти-ҳаракатларни қонунга хилоф деб атаган.

“Бу анча чўзилиб кетди! Шимолий Каролинада шунча узоқ вақт нима қилишмоқда? Улар бу ерда ҳам кўпроқ бюллетен излаб, ғалабани (демократлар номзоди Жо Байден ғалабасини) мустаҳкамлашмоқчими?” – деб ёзган Трамп.

Оқ уй раҳбари аввалроқ Жоржия штатида овозлар қайта ҳисобланиши эълон қилингани ҳисобига Шимолий Каролинада ғалаба қозонишига ишонч билдирган.

Твиттер ижтимоий тармоғи Трампнинг бу постини баҳсли ахборот сақловчи хабар сифатида белгилаган.

3 ноябрда ўтган АҚШ президенти сайловлари натижаларига ҳали расман якун ясалмаган бўлса-да, АҚШнинг бир қатор етакчи ОАВлари Жо Байден ғалаба қозонганини эълон қилди.

Шу муносабат билан Байденга кўплаб жаҳон етакчилари, жумладан, Саудия Арабистони подшоҳи, БМТ бош котиби, Туркия президенти ўз табрикларини йўллаган.

Тайёрлаган Шуҳрат Раҳимов

#АҚШ #президент сайловлари

2020 йилнинг 3 ноябрида АҚШда президентлик сайловлари бўлиб ўтади. 3 февраль куни демократлар қароргоҳида бирламчи сайловлар - кокуслар ва праймеризлар бошланган.