Сергей Лавровнинг сўзларига кўра, Россия тинчликпарвар кучлари Днестрбўйида ЕХҲТ маъқуллаган «5+2» гуруҳи қарорига асосан бўлиб турибди.
Россия ташқи ишлар вазири Сергей Лавров Молдованинг сайланган президенти Майя Сандунинг Днестрбўйидан Россия қўшинларини олиб чиқиб кетиш тўғрисидаги талабига жавоб қайтарди.
У Молдованинг янги раҳбарини Днестрбўйида тинчликпарварлик кучларини жойлаштириш бўйича илгари эришилган келишувларни ҳисобга олишга чақирди. Лавровнинг сўзларига кўра, Россия тинчликпарвар кучлари у ерда ЕХҲТ маъқуллаган «5+2» гуруҳи қарорига асосан бўлиб турибди.
«Улар энг аввало ушбу ҳудудда қонли низонинг қайта авж олиши юз бермаслиги учун муҳим ҳисобланувчи барқарорликни сақлаб туриш вазифасини бажармоқда», — деди Россия ташқи ишлар вазири.
Аввалроқ Майя Санду Днестрбўйидан Россия қўшинлари олиб чиқиб кетилиши шартлигини айтганди.