Байден жамоаси АҚШ санкцияларини қайта кўриб чиқади

Жо Байденнинг бўлажак маъмурияти Оқ уйнинг амалдаги раҳбари Доналд Трамп томонидан киритилган санкцияларни ҳар томонлама таҳлил қилиб чиқади. АҚШ молия вазирлигининг санкциялар бўйича бошқармаси фаолиятини Байден молия вазири ўринбосари сифатида танлаган Адевале Адейемо текширувдан ўтказади. 

 Gibson Dunn юридик компаниясининг маълумот беришича, Трамп маъмурияти 2017 йилдан буён 3900 марта санкция жорий этган (кунига деярли учтадан). Бу Оқ уй учун рекорд ҳисобланади: бунгача ҳеч бир президент йилига 700 мартадан ортиқ санкция киритмаган.  

Танқидчиларнинг таъкидлашича, Трамп маъмурияти санкциялардан ҳар қандай ташқи сиёсий муаммони ҳал қилишда универсал восита сифатида фойдаланган ҳамда жуда кўп ва тартибсизлик билан қўллаган. Экспертлар Трамп маъмуриятининг айрим санкциялари кўпинча самарали бўлган бўлса-да, улар яхши ўйланган иқтисодий сиёсатдан кўра кўпроқ пиарга ўхшаб кетади деб ҳисобламоқда.

Уларнинг фикрича, Байден ҳам Трампнинг тажовузкорона сиёсатини давом эттиради. Аммо бунда АҚШ санкция киритадиган бўлса, шерикларига қарши эмас, улар билан биргаликда жорий этади.

«Санкциялар камайтирилади деб ўйламайман, санкцияларни суиистеъмол қилиш камайтирилади», — деди давлат департаментининг санкциялар бўйича собиқ координатори Дэниел Фрид.

Ҳозирча Байден жамоаси Трампнинг қайси санкцияларини сақлаб қолиш ёки бекор қилиш тўғрисида гапирмаяпти. Аммо АҚШ санкциявий сиёсатининг диққат марказида Россия ва Хитой турибди, деб ёзади Bloomberg.