Россиялик ҳакерлар АҚШ Молия департаментига киберҳужум қилишда гумонланмоқда

Reuters агентлиги ўз манбаларига асосланган ҳолда хабар беришича, россиялик деб гумон қилинаётган ҳакерлар АҚШ Молия ва Тижорат департаментларининг ички электрон почталарини кузатиб келган. Бундан хабардор инсонлар бу айсбергнинг учи бўлиши мумкинлигидан хавфсирашмоқда.

Иш шунчалар жиддийки, ҳакерлар Миллий хавфсизлик кенгашининг Оқ уйда бўлаётган йиғинигача кира олишган. АҚШ расмийлари давлат идораларидан бирига ҳакерлик ҳужуми бўлгани ҳақидаги баёнотдан нари ўтмаган. Лекин Киберхавфсизлик ва инфратузилма хавфсизлик агентлиги ва ФҚБга текширув ўтказиш буюрилган.

«Биз бу ишга алоқадор барча қадамларни аниқлаштириш ва вазиятни ўнглаш учун зарур чораларни кўряпмиз», деган Миллий хавфсизлик кенгаши котиби Жон Уллйот.

АҚШ ҳукумати ҳакерлик хуружи ортида ким турганини ҳали оммага эълон қилмади, лекин текширувда қатнашаётганлардан бирининг айтишича, киберҳужум ортида Россия турибди. Умуман, бу катта киберҳужум кампаниясининг бир қисми деб қаралмоқда. Жумладан, икки манбанинг айтишича, хуружлар яқиндагина FireEye компаниясига ҳам уюштирилган. Компания ҳукумат билан киберхавфсизлик бўйича йирик тижорий шартномаларга эга.

Россия Ташқи ишлар вазирлиги фейсбукдаги саҳифаси орқали АҚШ оммавий ахборот воситалари АҚШ давлат идораларига уюштирилган киберҳужумларда Россия томонини асоссиз айблашга урингани ҳақида ёзган.