Британияда AstraZeneca вакцинасидан фойдаланишга рухсат берилди

Буюк Британия дори воситаларини назорат қилиш агентлиги (MHRA) AstraZeneca Англия-Швеция фармацевтика компаниясининг коронавирусга қарши вакцинасидан фойдаланишни маъқуллади. Бу ҳақда компания матбуот хизмати маълум қилди.

 "Буюк Британияда AstraZeneca компаниясининг COVID-19га қарши вакцинасидан шошилинч ҳолларда фойдаланишга рухсат берилди, дастлабки дозалар бугун чиқарилади ва янги йил бошларида вакцинация бошланиши мумкин", - дейилади компания хабарида.

 Хабарда айтилишича, вакцина 18 ёшдан катталарга мўлжалланган.

 "Рухсатга мувофиқ, 4-12 ҳафта оралиғида икки доза вакцина киритиш тавсия этилади. Клиник синовларда фойдаланилган ушбу режим хавфсиз ва самарали бўлди", - дейилади компания томонидан.

 Қайд этилишича, клиник тадқиқотлар натижаларига кўра, иккинчи доза киритилганидан 14 кун ўтганидан сўнг оғирлаштирувчи ҳолатлар кузатилмаган.

 Буюк Британия ҳукумати декабр бошларида дунёда биринчи бўлиб АҚШнинг Pfizer ва Германиянинг BioNTech компаниялари биргаликда ишлаб чиқарган вакцинани маъқуллаган, 8 декабрда коронавирусга қарши оммавий эмлашни бошлаганди.